Kva for nokre meieriprodukt bør gravide, eldre og personar med nedsett immunforsvar unngå?
Er du i risikogruppa er det nokre meieriprodukt du bør unngå å ete. Årsaka til dette er at det i desse produkta kan vere bakteriar som kan gjere deg sjuk. Mellom dei viktigaste av desse er listeria, E.coli og campylobacter.
Dei fremste risikogruppene for sjukdom på grunn av desse bakteriane er eldre og personar med nedsett immunforsvar. Listeriabakterien er i tillegg spesielt risikofylt for gravide, kor han kan føre til spontanabort, dødfødsel eller alvorleg sjukdom hos nyfødde.
Desse produkta bør du unngå:
- Muggost som brie, camembert og blåmuggostar
- Andre mjuke ostar og ferskostar når dei er laga av rå mjølk
- Halvfaste ostar som for eksempel gouda når dei er laga av rå mjølk
- Rå mjølk
- Andre meieriprodukt som er laga av rå mjølk og som ikkje er varmebehandla
Korleis kan eg vite om ein ost er pasteurisert eller ikkje?
Osteprodusentane i Noreg og EU er pålagde å merke ostar produserte av rå/upasteurisert mjølk utan varmebehandling med ”Framstilt av ikkje-pasteurisert mjølk” eller ”Framstilt av rå mjølk”. Mange forkortar denne merkinga til ”Upasteurisert/rå mjølk”.
Opplysingane finst ofte i ingredienslista, men det kan også stå andre stader på emballasjen.
Spør produsenten om du er usikker
Er du usikker på eit osteprodukt, kan du ta kontakt med produsenten eller importøren for å forhøyre deg. Det er produsentane som kjenner produkta best, og det er også deira ansvar å sikre at maten dei produserer er trygge.
Du kan ete alle ostar når dei blir brukte i varm eller oppvarma mat
Dei skadelege bakteriane vert drepne når produktet varmebehandlast. Alle ostar er difor trygge når dei er varmebehandla til over 70 grader. Det vil seie at alle typar ost brukte på pizza og eller som ingrediens i varme sausar er trygge å ete.