Registrering og godkjenning av næringsmiddelverksemder
Alle som driv næringsmiddelverksemd, må registrere seg hos Mattilsynet. Produserer du animalske næringsmiddel, er hovudregelen at du skal vere godkjend av Mattilsynet.
Innhald på denne sida
Registrering av næringsmiddelverksemd
Registrering betyr at Mattilsynet skal ha melding om at du driv næringsmiddelverksemd, kor verksemda ligg og kva som er aktivitetane til verksemda.
Dette er viktig for at Mattilsynet skal kjenne til verksemda og ha høve til å gjennomføre inspeksjonar.
Dersom du produserer eller haustar råvarer som skal brukast til mat, er dette ei næringsmiddelverksemd med primærproduksjon som du skal registrere. Du må óg registrere verksemda di om du driv du med servering, gardsbutikk, produserer mat som t.d. syltetøy, saft, brød og lefser.
Du treng ikkje registrere deg dersom du berre av og til leverer overskotet av råvarer frå primærproduksjon direkte til sluttforbrukar, eller er jeger som sel heile eller grovdelte slakt av viltlevande vilt.
Slik gjer du
Registrering av næringsmiddelverksemd
Du skal vere registrert eller godkjent hos Mattilsynet om du importerer, håndterer, lagrar eller omset næringsmiddel.
Du registrerer deg ved å bruke skjemaet "Ny matbedrift og/eller import, produksjon og engrossalg av matkontaktmaterialer" i Mattilsynet si skjemateneste.
Skjemaet skal også brukast dersom du vil utvide aktiviteten i ei allereie eksisterande verksemd og starte med ein ny aktivitet som ikkje er registrert.
Godkjenning av næringsmiddelverksemd
Produserer du animalske næringsmidlar, er hovudregelen at du skal ha godkjenning.
Animalske produkt er laga av kjøtt, sjømat, mjølk og egg. Eit animalsk produkt med små mengder tilsetjingar av vegetabilar er framleis animalsk.
Sidan produksjon av animalske matvarer kan vere ein større risiko for folkehelsa enn andre matvarer, skal Mattilsynet godkjenne desse verksemdene.
Når verksemda er godkjent, kan du omsette produkta dine fritt i heile Noreg og EU/EØS-området. Du får tildelt eit godkjenningsnummer som du må bruke i identifikasjonsmerket på alle emballerte produkt. Verksemda vil då stå på lista over godkjende verksemder.
Krav som må vere oppfylt før du søker om godkjenning av ny næringsmiddelverksemd
For at ei næringsmiddelverksemd skal bli godkjent, må fylgjande vere på plass:
- eigna lokale
- utstyr til å produsere trygge næringsmiddel
- eit system for mattryggleik, som viser at de har styring med grunnføresetnadane (til dømes reinhald, vedlikehald, skadedyrkontroll), har innført HACCP og har rutinar for sporing mv.
Alle som produserer næringsmiddel må følge ei rekke regler som skal sikre at næringsmidla som vert omsett er trygge. Krav til hygiene er først og fremst gitt i animaliehygieneforskrifta og næringsmiddelhygieneforskrifta.
Korleis du søker og kva søknaden skal innehalde
I søknaden skal du gje opplysingar om verksemda og om kva slags næringsmidlar du vil produsere.
Du skal opplyse kva du driv med i form av aktivitetar og produksjonsformer. Aktiviteten beskriv på eit overordna nivå kva du produserer, mens produksjonsformene gir ei meir detaljert skildring av produksjonen. Informasjon om verksemda og produksjonsformene går fram av Mattilsynet si liste over godkjende verksemder.
Søknaden skal innehalde
- verksemda sitt styringssystem for mattryggleik, basert på HACCP-prinsippa
- planteikningar av lokala som viser plassering av vesentleg produksjonsutstyr, vare- og personalflyt med vidare
- annan dokumentasjon som er relevant (antal tilsette, produksjon med vidare)
- dokumentasjon av vasskvalitet (dersom ein har eiga vasskjelde)
Styringssystemet for mattryggleik skal beskrive kven som er ansvarleg, korleis systemet skal fungere, og verksemda sine rutinar for grunnføresetnader. Aktuelle produksjonar skal vere skildra, og fareanalyse skal vere utført for desse.
FSMS-HACCP rettleiar for gjennomføring av styringssystem for mattryggleik
Dette gjer Mattilsynet når vi vurderer søknaden
Mattilsynet sjekkar at søknaden inneheld dei opplysingane som er naudsynte for å kunne behandle søknaden.
Ved behov vil vi be om meir informasjon innan ein gitt tidsfrist.
Dersom vi ikkje mottar dei naudsynte opplysningane innan fristen, avsluttar vi saka med vedtak om avslag.
Mattilsynet gjennomfører minst ein fysisk inspeksjon før godkjenning
Når vi har nok opplysningar til å vurdere søknaden om godkjenning, avtaler og gjennomfører vi ein fysisk inspeksjon. Vi vil då undersøke om verksemda oppfyller krava til godkjenning og avklare eventuelle spørsmål knytta til godkjenningssøknaden.
Etter inspeksjonen får du ei oppsummering av observasjonane våre, ei såkalla tilsynskvittering.
Dersom Mattilsynet etter inspeksjonen vurderer at krava er oppfylt, får nye verksemder som hovudregel ei tidsavgrensa, førebels godkjenning.
Nye verksemder får som hovudregel først ei førebels, tidsavgrensa godkjenning
Dette er ei godkjenning som kan gis inntil 3 månader om gangen. For fartøy som segler under norsk flagg, er tida avgrensa til 6 månader.
I perioden verksemda har førebels godkjenning, kan du produsere næringsmiddel, prøve ut styringssystemet og utføre naudsynte endringar.
Før perioden med førebels godkjenning er over, må du søke om godkjenning på ny
Du må søke i god tid før datoen den førebelse godkjenninga går ut. Dette er viktig, for når den førebelse godkjenninga er utgått, har du ikkje lenger lov å produsere og omsetje varene.
Du kan søke om ny godkjenning via e-post til Mattilsynet sitt lokale kontor, eller via Mattilsynet si skjemateneste. Mattilsynet vil deretter gjennomføre ein ny kontroll. Kontrollen kan være i form av ein ny inspeksjon eller ein dokumentkontroll.
Etter søknadsbehandling og kontroll vil Mattilsynet enten gi
- Endeleg godkjenning når alle krava i regelverket er oppfylt. Godkjenninga er ikkje tidsavgrensa.
- Forlenging av førebels godkjenning dersom det er grunn til å tru at du vil oppfylle krava innan ny tidsfrist. Forlenging av førebels godkjenning kan gis for nye 3 månader. Det vil seie at førebels godkjenning ikkje kan vare lenger enn 6 månader til saman. Unntaket er fabrikkskip og frysefartøy, som kan få forlenging i 6 månader.
Verksemder som er gitt forlenging må igjen søke på nytt før sluttdato. Mattilsynet vil vurdere å gjennomføre ein ny kontroll før sluttdatoen, for å undersøke om krava til godkjenning er oppfylt. - Avslag på søknaden om godkjenning dersom du ikkje oppfyller alle krava i regelverket. Du må då innstille drifta frå sluttdatoen for den førebelse godkjenninga.
Godkjenningsnummer
Alle verksemder som har fått førebels eller endeleg godkjenning, får tildelt eit godkjenningsnummer frå Mattilsynet.
Verksemda vil då stå på Mattilsynet si liste over godkjende verksemder.
Brukarrettleiing for pålogging til Mattilsynet sine skjematenester
Gebyr
Gebyret skal betalast ved avslutta behandling, det vil seie
- når ei godkjenning er innvilga
- når ein søknad er avslått
- når søknadsbehandlinga er avbrote på grunn av forhold hos verksemda
Forskrifta angir maksimalt gebyr, det vil seie at du ikkje skal betale meir enn den satsen som står i forskrifta vedlegg 1 kapittel II.
Dersom Mattilsynet har brukt mindre tid på saksbehandlinga, kan gebyret bli sett lågare.
Du skal ikkje betale eit eige gebyr for førebels godkjenning, men når gebyret blir rekna ut etter at saka er avslutta, blir tidsbruken på førebels godkjenning også rekna med.
Unntak frå krav til godkjenning
Mindre verksemder treng ikkje å søke om godkjenning, dersom verksemda driv i samsvar med krava lista opp under.
Bakgrunnen for unntaka er at det her vert produsert mindre mengder, produkta når fram til færre menneske, og at det ofte er god oversikt over distribusjonen og direkte kontakt mellom produsent og forbrukar. Ei slik verksemd kallast ein detaljist, og du må registrere drifta hos Mattilsynet.
Du treng ikkje godkjenning dersom du berre leverer direkte til sluttforbrukar
"Direkte" betyr her at det er fysisk kontakt mellom produksjonsverksemd og sluttforbrukar ved bestilling eller overlevering av produktet. Det skal vere lagt til rette for sal til privatpersonar. Døme på dette er eige utsal eller sal over disk, utlevering på REKO-ring eller sal på bondens marknad.
Har du eit reelt sal der du møter kunden fysisk, kan du bruke ei leveringsteneste, til dømes sykkelteneste eller drosje, til å levere produkt direkte til sluttforbrukar i nærområdet ditt.
Du treng ikkje godkjenning dersom du leverer til sluttforbrukar og leverer til andre detaljistar som berre leverer til sluttforbrukar, og oppfyller alle desse tre vilkåra:
-
Lokal aktivitet: Du leverer til andre detaljistar i same fylke eller innanfor ein maksimal avstand på 100 km. Dersom du kan vise at naturleg område for sal går ut over desse grensene, kan du levere i eit større område.
Ved sal direkte til sluttforbrukar i Noreg er det ikkje krav til avstand. Du kan til dømes sjølv ta med animalske produkt og selje dei på ein marknad på ein annan kant av landet. -
Marginal aktivitet: Du leverer maksimalt 600 kg produkt per veke (gjennomsnitt over 6 månader = totalt 15 600 kg) til andre detaljistar. Mengde direkte til sluttforbrukar kjem i tillegg.
Ved svært små produksjonsmengder på stader kor det er lite mogeleg å selje direkte til sluttforbrukarar, kan Mattilsynet vurdere det som tilstrekkeleg at det er lagt til rette for sal. Døme på dette er seterdrift der det sjeldan kjem folk innom, men at ei turisthytte kjøper produkta. -
Avgrensa aktivitet: Du leverer til andre detaljistar, som igjen leverer direkte til sluttforbrukarar. Som detaljist kan du ikkje selje animalske varer via grossist eller andelslag.
Andre unntak frå kravet om godkjenning
Du treng heller ikkje godkjenning dersom du
- bruker foredla (til dømes varmebehandling, røyking, salting, modning og/eller tørking) animalske råvarer i produksjonen, men verksemda skal vere registrert
- bruker rå egg i bakeriprodukt
- produserer honning
Det er særskilde reglar for vilt, kaninar og fjørfe:
Registrering, sertifisering og godkjenning av fjørfehold og rugerier
Registrering og godkjenning ved nettsal og kortvarig sal av mat
Om du må registrere eller søke godkjenning for nettsal og kortvarig sal av mat, kjem an på korleis salet går føre seg.
Nettsal
Dersom du sel animalske produkt via internett og ikkje leverer varene direkte til sluttforbrukar, må verksemda ha godkjenning.
Leverer du varene direkte til sluttforbrukaren, er det ikkje krav til godkjenning. Det kan til dømes vere eige utsal, på messer, eller gjennom REKO-ring.
Kortvarig sal av mat
Dersom du sel eller serverer mat på messer, festivalar, bondens marknad etc., skal du registrere det i skjematenesta. Når du har meldt frå om at du driv med "mobilt sal", treng du ikkje å melde frå til Mattilsynet om dei ulike plassane og tidspunkta du skal selje.
Dersom du skal ta med animalske produkt til utlandet på t.d. messer eller konkurransar, er det krav om at verksemda er godkjent. Registrerte verksemder kan i særskilte høve delta i konkurransar. Ein må då søke vertslandet om løyve, og høyre om produktet kan sendast som vareprøve.