3. Kompetanse og kunnskap

Alle verksemder har mål de vil nå og oppgåver som skal utførast for å nå måla.

For å kunne realisere måla, må alle tilsette ha tilstrekkeleg kompetanse, kunnskap og ferdigheiter. De må kjenne til kva behov fisken har, kva som skal til for å unngå sjukdom i anlegget, korleis de skal nytte utstyret og kva samfunnet forventar. Som tilsette må de vite kva de skal gjere og korleis det skal gjerast. Som regel er det klokt at de veit kvifor de skal gjere det òg.

Kompetanse og kunnskap fører til at vi innrettar oss til oppgåver og problem på tilpassa måtar. Det kan òg vere heilt avgjerande for haldningane til det arbeidet kvar og ein held på med. Slik sett er kompetanse og kunnskap ein bærebjelke for kulturen i verksemda.

3.1 3.1 Styringssystemet og kompetanse

Ein føresetnad for forsvarleg aktivitet eller drift på eit område er ofte at ein har spesiell kompetanse. Til dømes at ein har eit bestemt sertifikat, ein autorisasjon eller har gjennomgått ei eller anna opplæring.

Både matlova, dyrevelferdslova, akvakulturlova og forskriftene til desse stiller krav om nødvendig fagleg kompetanse. Akvakulturdriftsforskrifta § 6 stiller til dømes detaljkrav til formell utdanning for driftsansvarleg på akvakulturanlegg.

Internkontrollforskriftene våre stiller også krav som gjeld kompetanse, kunnskap og ferdigheiter. Men internkontrollforskriftene handlar meir om prosessane verksemda har for å sikre nødvendig kompetanse. Korleis vil du som leiar sikre at dine tilsette har nødvendige føresetnader – kompetanse, kunnskap og ferdigheiter – til å løyse oppgåvene dei har fått? Dersom de klarar å etablere eit system i verksemda som heile tida sikrar at oppgåvene blir løyst av tilsette med gode ferdigheiter og rett kompetanse, vil risikoen for svikt og lovbrot minke.

Gjennom styringssystemet skal de som leiarar sikre at det er nok arbeidskraft, at dei tilsette har formell kompetanse der det er nødvendig, at dei blir gitt relevant opplæring og at kunnskapen deira blir høveleg oppdatert med tida.

Kjennskap til interne rutinar og prosedyrar

Både IK-mat og IK-akva har krav om at dei tilsette blir oppdaterte på og heile tida er kjent med korleis IK-akva rettleiar 9 de har bestemt at dei skal løyse oppgåvene sine. Med andre ord må tilsette kjenne til relevante rutinar og prosedyrar som gjeld deira område og deira oppgåver.

Kjennskap til organisasjon og ansvar

At tilsette kjenner til eige ansvarsområde er sjølvsagt rimeleg å forvente. Leiarane må sikre at tilsette kjenner til organiseringa og/eller har lett tilgang på informasjon om dette. Alle tilsette må vite kven som har ansvar på deira arbeidsområde.

Kjennskap til viktige lovkrav

Eit av dei sentrale føremåla med internkontroll er at de skal arbeide systematisk med å etterleve krav i lover og forskrifter. Det bør derfor være mogleg for tilsette å finne fram til relevante krav i regelverket på deira område, og dei må kjenne til innhaldet i dei viktigaste krava.

3.2 3.2 Opplæring

Organisasjonskulturen og kompetansen til den enkelte vil utviklast kontinuerleg. Dette skjer naturleg i samhandlinga med andre tilsette og andre kompetansemiljø.

Konkrete tiltak for å heve kompetansen og utvikle organisasjonskulturen i riktig retning kan likevel være avgjerande for å lukkast. Dei aller fleste verksemder har behov for opplæringstiltak. Opplæring skal bidra til å:

heve kompetanse- og kunnskapsnivået
bevisstgjere og auke aktsamheit
utvikle ferdigheiter og erfaring
bygge kultur

Kompetanse og kunnskap

Systematisk opplæring skal mellom anna sikre at dei tilsette har tilstrekkeleg kompetanse og kunnskap for å kunne utføre sine arbeidsoppgåver på ein god måte. Behova for opplæring vil variere alt etter arbeidsoppgåver og rolle i organisasjonen. Noko kunnskap skal den enkelte ha under huda, medan det for andre oppgåver held å kunne slå opp ved behov.

Aktsemd

Aktsemd vert styrka når du veit kvifor rutinane er som dei er. Når ein ikkje kan ta snarvegen for å løyse ei oppgåve, er det alltid nyttig å kjenne føremålet med å utføre arbeidsoperasjonen ved å gå den «tunge» vegen. Å få dei tilsette til å forstå og bevisstgjere dei på føremål, risiko, konsekvensar, vil kunne vere avgjerande for å få ønska handlemåtar. Det gjer også at dei tilsette blir meir bevisste på eiga rolle i organisasjonen.

Ferdigheit og erfaring

Når tilsette har fått kunnskap om kva dei skal gjere og kvifor dei gjer det, er tida komen for å setje det ut i livet, å praktisere det i kvardagen. Det er desse konkrete handlingane som gir resultata og som heile verksemda er avhengig av. Gode ferdigheiter heng ofte saman med trygge tilsette. Den som er trygg på eigne ferdigheiter har praktisert og fått erfaring. I mange høve er det også viktig å trene på den praktiske utføringa.